DAVID WA MAAHLAMELA
Three Poems
Visiting a top-dog
Pity! Pity!
I have no time for later
Waiting? Waiting?
Rather drop it, doesn’t matter
I approached him
To narrate my thoughts
What did he say?
Let’s discuss it later
Pity! Pity!
I have no time for later
Waiting? Waiting?
Rather drop it, doesn’t matter
KGAREBEKGOLOMODUMO
Le ge ba re nku re reka mosela
Mo gona o be o tsenwe ke kota ihlong.
Ntome tsebe wešo, o re ke yena yo?
Poo ye ya lekgarebe?
Meriri ya leetse, lešoka la bofulatau,
Mahlodikgampi nke o setlilwe ke lebake
A go hlaba ka ona o gagabiša sefahlego.
Tsebemakgaphakgapha pshio tša tlou,
Dipolai ke dikgero makgonagedi,
Maširaphefo e le megoma makgathalehwiti,
Mmamabadibadi tlalomeediedi
Nke o bjaragaditšwe ka seretse,
Fahlego e le sona sa ramaswaile se ipheditše,
Badimo, tsogang le tle le mpontšhe!
Wešo, ntome tsebe: o re ke yena yo?
Kgarebekgolomodumo ye?
Mmelemafehlefehle nke o netšwe ke mahlophaasenya,
Lehwafa le hlaba makgoši la go šiiša,
Bona mafuri, dipepenene ka nnete,
Le ge ba re meetsematšididi ke meetsematšididi,
A timola lenyora go swana,
Fela tše ke dikhupamarama, diruthulamatswalo samma,
A nke o bone mosepelo...
O babaila nke o hlabilwe ke mampatakgamo,
Ka manotlo a dithethenkgwane tša batala.
Ge o robetše naye o lora toro dife?
O re ka mmakgonthe ’a kgodi a kgokgo ke yena yo?
Se iše pelo mafiša madi’ ešo, e re ke go leše mohudu:
E ba sepharamedi, ngamarela tii-tii!
Sa tsopa ke go kgwahla.
KE LEMA KE LE NOŠI
Go lema ke a lema,
Ke lema ke le noši.
Go mpha ihla ba a mpha,
Fela ba mpha ba sa mphe.
Go kopela ke a kopela,
Ke kopela ke le noši.
Go mpona ba a mpona,
Fela ba mpona ba sa mpone.
Go hlagolela ke a hlagolela,
Ke hlagolela ke le nkoši.
Go nkadima letsogo ba a nkadima,
Fela ba nkadima ba sa nkadime.
Hlaba lehlabula nako ya go khora,
E tla ba dintši mpokeboke,
Di wela phonkge maswing’ešo,
Le go gama di sa go tsebe.
TWO MORE PAGES ARE COMING HERE!!!!